Ky është momenti kur, pakoja me rreth 500 gramë tritol, ra nga makina e biznesmenit fierak, Nuredin Suli.
Pamjet e sigurisë në parkingun e qendrës tregtare, në zonën e Komunës së Parisit, të siguruara nga Televizioni Klan, tregojnë se u shkëput tritoli nga Mercedesi i blinduar, sapo ai doli nga vendi i parkimit.
Pakoja e mbështjellë me natriban ishte e lidhur me një celular, i cili kishte një kartë SIM, që ishte aktivizuar të hënën.
Telefoni kishte dy thirrje të humbura dhe sipas grupit hetimor, kjo është provë se autorët kanë tentuar ta hedhin në erë mjetin, në kohën kur Suli ishte brenda tij, por shpërthimi i komanduar nuk ka funksionuar, për shkak të defektit në lidhjen e fijeve.
Grupi hetimor po kqyr pamjet e kamerave të sigurisë në përpjekje për të evidentuar personat që i janë afruar makinës së 53 vjeçarit Suli.
Nga ana tjetër, mësohet se mjeti tip Benz Mercedez, me targë AA 667 GT I është i blinduar dhe sipas policisë, edhe nëse do të shpërthente sasia e eksplozivit, ajo nuk do të mund t’i shkakonte dëmtime për jetën Biznesmenit Nuredin Suli.
Gjatë orëve të para të mëngjesit të së mërkurës është bërë e mundur identifikimi dhe shoqërimi në Policinë e Tiranës të dy personave që duken në kamera të sigurisë duke u larguar me vrap.
Nga verifikimet dhe marrja në pyetje ka rezultuar se këta shtetas janë banorë të komplekti të banimit në qendrën tregtare dhe se janë larguar për shkak të panikut pas marrjes dijeni për një bombë afër vendit ku kishin parkuar mjetet e tyre.
Në pyetje është marrë dhe vëllai i Gëzim Sulos, autor i vrasjes së Naim Sulit, vëllait të biznesmenit, në vitin 2012.
Ai ka dhënë shpjegimet në polici, duke mohuar që familja e tij të ketë lidhje me ngjarjen.
Nuredin Suli e parkonte mjetin e tij gjithmonë në një vend të veçuar të parkingut, ku nuk shquhej nga kamerat e sigurisë.
Grupi hetimor dyshon se lënda plasëse i është vënë brenda në parkim. Por nuk përjashtohet mundësia që ajo të jetë ngjitur poshtë makinës kur ajo ka qenë e parkuar në ndonjë vend tjetër.
Pista kryesore e hetimeve është ajo e hakmarrjes, pas konfliktit mbi 5 – vjeçar të familjes Suli dhe Sulo në Fier. /Tv Klan/
