Durrësi është ngritur nën ujë mëngjesin e sotëm, si pasojë e përmbytjeve të shkaktuara gjatë natës.
Reshjet e vazhdueshme të shiut kanë sjellë vështirësi të mëdha në qarkullimin e njerëzve dhe të makinave në aktivitetin e përditshëm. Deri në 40 cm ujë është vënë re në disa rrugë kryesore të qytetit, ndërsa në periferi, situata është edhe më e rëndë si rezultat i reshjeve dhe mungesës së energjisë elektrike.
“Durrës Lajm” sjell edhe situatën problematike të mëngjesit të sotëm. E gjithë rruga e shëtitores “Taulantia” është nën ujë, në hyrje të portit pranë Kishës Ortodokse, ishte pothuajse e pakalueshme. Zona rreth stadiumit, rruga “Skënderbej” deri te Stacioni i Trenit nën ujë, rrugët e lagjes 16, pranë zjarrfikëseve, dhe rrugët e tjera deri në rrugën “Aleksandër Goga”, ishin me prezencë të lartë uji. Këmbësorët e kanë pasur krejtësisht të pamundur kalimin në rrugë, ndërsa shumë makina janë bllokuar në rrugë, u janë fikur motorët, ose kanë rënë në pusetat e hapura.
