Teksa eskorta dërgonte Kryeministrin Edi Rama në Korçë aty ku zhvillohen mbledhjet e dy qeverive Kosovë-Shqipëri, dy makina të Ministrisë së Brendshme u përfshinë në aksident me dy automjete private. Të plagosur më rëndë kanë mbetur 3 punonjës të Gardës, ndërsa dy persona që udhëtonin në Golf 5 janë dëmtuar më lehtë. Ende nuk ka dalë një ekspertizë e saktë për dinamikën e aksidentit, por ajo që vihet re është se Policia e Shtetit 15 minuta pas aksidentit nxiton të shpallë fajtor drejtuesin e makinës private Golf 5.
Në njoftim për mediat thuhet se: “Në aksin rrugor Maliq-Korçë pranë fshatit Bulgarec, ka ndodhur një aksident rrugor. Nga të dhënat e para rezulton se në aksident janë përfshirë 4 automjete, ku dy janë të eskortës së Kryeministrit si dhe një mjet tip “Volksvagen” me targë AA 426 FD dhe një Range Rover” me targë AA 313 DX. Si pasojë e përplasjes janë dëmtuar tre punonjës të Gardës K.Ll, E.M, dhe Sh.P, të cilët po marrin mjekim në spital dhe ndodhen jashtë rrezikut për jetën. Paraprakisht mesohet se mjeti tip Woslwagen, qe udhetonte ne krah te kundert me eskorten, duke mos respektuar largësinë dhe për shkak të shpjetësisë e lageshtisë në rrugë ka goditur makinen tip ‘Range Rover’ qe udhetonte para tij dhe uli shpejtesine, e me pas makinen e 4-rt në radhë të eskortës së kryeministrit, e cila ka dale nga rruga”, deklaron policia e Korçës.
Por gazetarë në vendin e ngjarjes thanë se mjeti “Mitsubishi” qe ishte pjese e eskortes së Ramës është dëmtuar shumë. Ka qenë “Mitsubishi” me targa MB 277 AA i cili është përplasur me makinën “Golf” me targë AA 426 FD në emër të Aleksandër Naçi”. Më pas në aksident është përfshirë edhe “Toyota” e Gardës e cila ka përfunduar në kanal.
Bëhet e ditur se tre punonjës të Gardës, Ervin Musai, Klodian Llaka dhe Shkëlqim Pojana (shofer) kanë mbetur të lënduar si dhe dy persona të tjerë të cilët ndodheshin në automjetin “Golf”. Tre gardistët e lënduar udhëtonin me makinën “Toyota”.
Të plagosurit:
Ervin Musai (Gardist)
Klodian Llaka (Gardist)
Shkëlqim Pojana (shofer)
/Opinion.al
