Rreth 20 persona janë shoqëruar në polici për tu marrë në pyetje në lidhje me atentatin e ndodhur mbrëmjen e djeshme në rrugën “Xhanfise Keko” në Tiranë pranë zonës së njohur si “Xhamlliku”.
Dëshmitarë të ngjarjes janë shprehur për policinë se skena e mbrëmshme i ngjante atyre të filmave. Viktima Santiago Malko po udhëtonte me automjetin e tij tip “BMW X5” teksa një furgon i bardhë i është afruar për ta parakaluar. Sipas dëshmitarëve viktima kur ka vënë re se po e ndiqnin ka shtuar shpejtësinë por autorët kanë arritur ti afrohen dhe kanë hapur breshëri ndaj tij duke e lënë të vdekur. Pasi është qëlluar automjeti BMW është përplasur në një mur aty pranë.
Furgoni tip “Mercedes Benz” më pas është larguar në rrethinat e kryeqytetit për tu gjetur më vonë i djegur në fshatin Ferraj. Nga vendi i ngjarjes deri në vendin ku u gjet automjeti i djegur, policia thotë se duhet një kohë rreth 15 minuta për tu përshkuar. Brenda furgonit është gjetur edhe një armë kallashnikov e cila dyshohet të jetë përdorur për atentatin.
Në vendin e ngjarjes policia ka gjetur 9 gëzhoja por dyshohet që të jenë qëlluar më shumë plumba pasi një pjesë e gëzhojave mund të kenë mbetur brenda furgonit nga ku u krye atentati. Bëhet me dije gjithashtu se policia ka identifikuar një të dyshuar për ngjarjen. Ai është një person me iniciale D.A dhe sic thuhet në burime nga grupi hetimor ka patur precedent penal në fushën e narkotikëve si edhe ka qenë i angazhuar në biznesin e lojërave të fatit ashtu si edhe viktima.
Santiago Malko ka qenë i njohur për policinë jo thjesht si një ish-punonjës por edhe për faktin se ka patur precedentë penalë. Ai ka qenë prezent në të paktën dy ngjarje kriminale, ku njëra është konflikti me armë në zonën e ish-bllokut më 4 tetor të vitit të shkuar dhe tjetri nj konflikt me vëllezërit Lashi në vitin 2016. /Opinion.al
