Ka përfunduar me reagim proteste të disa personave një aktivitet i mbështetur nga prezenca e OSBE në Elbasan. Në fund të aktivitetit disa persona kanë vlerësuar mesazhin e përcjellë nga shfaqja e prezantuar në këtë teatër, por janë shprehur mjaft të revoltuar me situatën e tanishme.
Sipas tyre, mesazhi është kuptimplotë, por ai nuk ka vlerë, sepse “në Shqipëri është instaluar klika komuniste, e cila po e shtyp dhe po e rrjep popullin”. “Të persekutuari, sipas tyre, po vazhdojnë të persekutohen. Është dashur ndërhyrja e aktorit Alfred Trebicka, i cili ju drejtua spektatorëve të revoltuar se kjo ishte një shfaqje dhe se nuk duhet të ngatërrohet me politikën, shkruan “shekulli”.
Pasditen e së hënës në teatrin “Skampa” në Elbasan u dha shfaqja kushtuar pasojave të diktaturës me titull “Ata hynë pa trokitur”, nën drejtimin e Armand Borës dhe aktorëve protagonistë Alfred Trebicka dhe Rozi Kostani. Ambasadori i OSBE, Rauning, i cili ishte pjesëmarrës në këtë takim deklaroi që në fillim të shfaqjes se “qëllimi i kësaj pjese është që shqiptarët të fillojnë të diskutojnë për të kaluarën”.
“Ne kemi ndërmarrë një iniciativë që shqiptarët të mund të flasin, të diskutojnë, të kundërshtojnë”, tha ambasadori. Sipas tij, edhe përmes artit është një mënyrë për të diskutuar, por edhe për të kundërshtuar.
E gjithë shfaqja ishte një skenë e asaj çfarë kanë përjetuar shumë familje shqiptare në diktaturë. Dy aktorët kanë përcjellë me mjaft emocion këtë mesazh, që është shoqëruar me reagime në sallë ku të pranishmit.
Rauning nënvizoi se “pikërisht ky ishte qëllim i kësaj shfaqje që njerëzit të fillojnë të diskutojnë për të kaluarën madje dhe të kundërshtojnë”. Shfaqja u mirëprit nga publiku elbasanas. Autori dhe regjisori Armand Bora e solli si një pjesë të shkruar në vitin ‘95, një realitet i mjaft familjeve elbasanase në kohën e diktaturës.
