Partia Socialiste ka shkarkuar sot kreun e këshillit të qarkut Vlorë, Sadri Danaj, pasi ku i fundit u bë me lëvizjen “Zgjidhja” të Koço Kokëdhimës. Mbledhja ka patur tensione dhe madje edhe kacafyetje. Sherri është zhvilluar mes socialistëve, pasi LSI braktisi mbledhjen. Gjithashtu edhe PD-ja është në bojkot. Por PDIU dhe Mega i dhanë votat e tyre pro shkarkimit edhe pse nuk u përfshinë në debat.
Në fund të mbledhjes, kryetari sapozgjedhur Ervis Moçka është përleshur me kryetarin e shkarkuar, Danaj.
Danaj e ka cilësuar votimin si një farsë, ndërsa u shpreh pas mbledhjes se “unë përfaqësoj alternativën dhe kauzën që është ‘Zgjidhja’”.
Kryebashkiaku i Vlorës, Dritan Leli kërkoi mocion mosbesimi, ndërsa Danajt iu drejtua me fjalët ‘Ke humbur besimin e socialistëve’.
Por, Danaj nuk ka pranoi që kërkesa të hidhet sot në votim, pasi pretendonte që duhet të kalojnë 10 ditë sipas ligjit, që të njihet me kërkesën, por PS këmbënguli dhe votimi u bë.
Ndërsa LSI u largua duke braktisur mbledhjen, pasi më herët kërkoi që të ketë një konsultim brenda koalicionit dhe votimi të shtyhet për në mbledhjen e radhës.
Të pranishëm në mbledhjen e qarkut ishin edhe ministri Gjiknuri me deputetin Marto dhe kryetari i PS.
