Ilir Meta nuk e dekretoi si Ministër, por Rama nuk hoqi dorë, duke emëruar Sandër Lleshin si zv/ministër i Brendshëm në një mbledhje të posaçme të qeverisë. Si asnjëhere më parë, pas mbledhjes së qeverisë, Edi Rama shkoi vete për të prezantuar Sandër Lleshin në Ministrinë e Brendshme. Ata mbërritën me të njëjtin automjet në godinën, ku më parë kishte mbërritur edhe Fatmir Xhafaj për t’i dorëzuar detyrën Lleshit.
Rama dhe Lleshi ngjitën bashkë shkallët e Ministrisë së Brendshme, teksa ata i ka pritur një tjetër zv/ministre, Romina Kuko. Mësohet se në prezantimin kortezial të Lleshit kanë qenë të pranishëm edhe 4 zv/ministrat, Sekretari i Përgjithshëm i ministrisë dhe Drejtori i Policisë së Shtetit, Ardi Veliu.
Pas këtij takimi gjeneral Lleshi ka urdhëruar edhe një mbledhje me drejtorët e policive në qarqe, ku pritet të prezantojë edhe objektivat e tij.
Ndërkohë pas takimit, kryeministri Rama dhe Fatmir Xhafaj janë parë të dalin të dy nga Ministria e Brendshme, por asnjëri prej tyre nuk ka pranuar të prononcohet për mediat.
