Ata e kanë patur shtëpinë apo punën gjithnjë aty, pranë Gjykatës së Shkallës së Parë Tiranë, por nuk kanë parë kurrë kaq shumë polici. Të shqetësuar disa qytetarë kanë nisur foto në Opinion.al dhe dëshmojnë se janë penguar të kryejnë punët e përditshme, pa asnjë arsye. “Kisha parkuar makinën tek puna, pranë ish-ekspozitës dhe kur tentova të dal më ndaloi policia. Kam një orë që kërkoj të largohem, por nuk më lejojnë. Më pyesin kush je? Ca bën? Ku shkon? Lëre makinën ikë në këmbë”, tregoi një qytetare. Po kaq edhe prindërit që kanë fëmijët në shkollat që ndodhen pranë gjykatës sot kanë patur të njëjtën vështirësi. “Të jepet përshtypja sikur jemi në luftë”, thotë një tjeter qytetare që tentoi të kalonte si zakonisht në rrugën Myslym Shyri.
Masat e rrepta të sigurisë janë marrë për gjyqin e 23 protestuesve kuksianë që protestuan në Rrugën e Kombit. Gjyqi i tyre u shoqërua me tension, pasi policia tentoi të pengonte deputetët e opozitës në sallë. Sakaq Tirana vazhdon të mbahet në shtetrrethim me 1 mijë policë në terren.
*Foto brenda lagjes, ku ndodhet edhe gjykata e Tiranës në Bulevardin Gjergj Fishta
