Një 25 vjeçar ka arritur t’i ikë policisë së Lezhës, teksa ka qëlluar me armë në drejtim të forcave të rendit.
Shtetasi Armarildo Ndoj, 25-vjeç, banues në Rrëshen është shpallur në kërkim nga policia pasi ishte dënuar me 8 vite burg për vrasje të mbetur në tentativë dhe zotërim të armëve luftarake pa leje.
Policia e Mirditës ka lokalizuar vendndodhjen e tij gjatë natës së shkuar në vendin e quajtur Kodër-Rrëshen, por ai ka mundur t’u ikë për shkak të kërcënimit me armë.
Por kush është Amarildo Ndoj?
Shtatë vjet më parë, në qytetin verilindor të Rrëshenit, vritet 20-vjeçari Edison Jaku përballë shtëpisë së tij dhe 20 metra larg portës kryesore të Komisariatit Mirditë.
Ngjarja ka ndodhur rreth orës 22:20 të së hënës, ku shtetasi Tonin Biba në bashkëpunim me Amarildo Ndoj ekzekutojnë me breshëri automatike 20-vjeçarin Edison Jaku.
Viktima ishte duke u kthyer nga puna si kamerier në një internet-kafe të qytetit, kur është qëlluar me breshëri automatiku nga dy persona. Pas nisjes së hetimeve, policia ka identifikuar dy autorë të mundshëm të ngjarjes dhe u vu në kërkim të tyre.
Fillimisht në prangat e policisë ka rënë Amarildo Ndoj, i cili u prangos gjatë orëve të paraditës, ndërkohë që vetëm disa orë më pas është arrestuar dhe autori i dytë, Tonin Biba.
Një fakt interesant në lidhje me Ndojn në momentin e arrestimit në vitin 2009 në Rrëshen, është se në kohën kur është kapur nga policia e Lezhës, ai kishte hedhur nga dritarja e apartamentit armën e krimit pistoletë e tipit “TT” dhe, ishte shtrirë për të fjetur.
Me pretekstin se ai nuk kishte kryer asnjë krim për të cilin akuzohej. Familjarët e tij, kanë mbetur të shokuar dhe as nuk e prisnin se djali i tyre, mund të kishte marrë pjesë si autor në një krim të tillë makabër.
Viktima, Edison Jaku, ishte masakruar i gjithi nga breshëria e plumbave. Kjo ngjarje, tronditi thellësisht, qytetin e vogël dhe të qetë të Rrëshenit. /Opinion.al/
