Kjo foto është realizuar vetëm pak minuta pas ngjarjes së rëndë në rrugën Don Bosco, ku një grua humbi jetën pas një sulmi me armë ndaj një lokali.
Sikurse shihet në këtë foto, brenda lokalit duket edhe trupi i një personi, që sikurse policia bëri me dije është viktima Mimoza Paja, punonjëse e lokalit.
Ndërkohë, janë zbardhur emrat e 5 personave të plagosur që janë: Shehat Murati, Emanuel Sala, Astrit Meraj, Ermir Bejuku dhe Genc Shoholli. Mes të plagosurve gjendet edhe një vajzë 10-vjecare, e cila është lënduar nga ciflat e xhamave të thyer gjatë sulmit me armë.
Njoftimi nga Policia
Tiranë/Informacion paraprak
Më datë 12.03.2023, rreth orës 21:05, në rrugën “Ananstas Shundi”, në lokalin në pronësi të shtetasit F. M., në rrethana ende të paqarta, nga persona ende të paidentifikuar, është qëlluar me armë zjarri.
Si pasojë ka humbur jetën shtetasja Mimoza Paja, rreth 60 vjeçe, banakierja e lokalit, si dhe janë plagosur shtetasit S. M., 50 vjeç, A. M.,42 vjeç, E. S., 47 vjeç, E. B., 45 vjeç, G. Sh., 55 vjeç, të cilët ndodhen nën kujdesin e mjekëve.
Gjithashtu është lënduar në dorë nga ciflat e xhamave, një e mitur 10-vjeçare.
Për hetimin e kësaj ngjarjeje është ngritur një grup i posaçëm hetimor dhe nën drejtimin e Prokurorisë vijon puna intensive për zbardhjen e rrethanave të ngjarjes, sekuestrimin e provave që do të shërbejnë për zbardhjen e ngjarjes, identifikimin dhe kapjen e autorëve.
Ndërkohë janë ngritur pika kontrolli në bashkëpunim me Drejtoritë Vendore të Policisë Durrës, Elbasan, Lezhë e Dibër.
Shërbimet e Policisë po vijojnë kontrollet në gjithë territorin ku dyshohet që mund të kenë lëvizur ose ku mund të fshihen autorët./Opinion.al
