Ngjarjet e fundit të arrestimit të kreut të AAK-së, Ramush Haradinajt në Francë, kanë prekur shumë personazhe të njohura nga fusha të ndryshme.
Ish kapiteni i kombëtares, Lorik Cana i është bashkuar listës së personazhe që kanë kërkuar lirimin e Haradinajt.
Nëpërmjet një postimi në Instagram në gjuhën franceze ka theksuar se ky është një veprim i motivuar politikisht.
“Desha të jap gjithë mbështetjen time për z. Ramush Haradinajn, i cili edhe një herë është persekutuar nga një urdhër-arrest ndërkombëtar, i lëshuar nga shteti serb dhe i cili është i motivuar politikisht, për faktet që z. Haradinaj është shpallur i pafajshëm dy herë nga Tribunali Penal Ndërkombëtar!!!”.
“Të gjithë shpresojmë që drejtësia franceze ta lejojë kthimin e shpejtë të z. Haradinajt te familja e tij. Miqësisht, Lorik Cana”, shkruan futbollisti shqiptar.
Theksojmë se një pjesë të gjatë të karrierës së tij, Cana e ka kaluar në Francë. Ai ka luajtur te Paris Saint-Germaini (2000-2005), Marseille (2005-2009) dhe së fundmi te Nantes (2015–2016).
