Kategoria Superiore ka mbyllur dy fazat e saj të para dhe futbollistët janë munduar të japin më të mirën e tyre. Pas çdo ndeshjeje të luajtur, “Panorama Sport”, duke u konsultuar me specialistë të ndryshëm, ka bërë edhe formacionin më të mirë, duke u bazuar në paraqitjet që ata kanë bërë.
Dhe duke mbledhur të gjitha prezencat e tyre në formacionet më të mira gjatë këtyre 18 javëve, ka krijuar edhe formacionin më të mirë të dy fazave të para të sezonit, ku edhe surprizat nuk kanë munguar.
Formacioni me i mire 2016
Natyrisht që të bësh një klasifikim të tillë nuk është aspak e lehtë, pasi janë një mori futbollistësh që duhen analizuar dhe është puna e disa muajve e mbledhur së bashku. Nuk kanë munguar dhe balotazhet, siç ka qenë rasti i Shametit me Hoxhallarin. Por natyrisht ka edhe nga ato raste ta padiskutueshme, siç është ai i Trashit me katër prezenca në formacionin më të mirë, apo i Bicajt, mbrojtësit të Vllaznisë me po të njëjtin numër.
Ndoshta askush nuk e ka pritur që Agoviç të ishte në këtë formacion, por me katër prezenca ai ka arritur të fitojë duelin me Ilion Likën dhe Enea Koliçin, si dhe ka lënë mbrapa Hoxhën e Partizanit dhe Shehin e Skënderbeut. Në këtë formacion, skuadra që ka më shumë lojtarë është Tirana, me tre të tillë, një në mbrojtje dhe dy në mesfushë, ndërsa pas saj me numër të barabartë janë Vllaznia dhe Kukësit me nga dy. Nuk mund të mungonte Bregu i Luftëtarit, që është cilësuar edhe si një nga zbulimet e këtij sezoni.
Trajnerët
Balotazh ka pasur edhe në stol. Ernest Gjoka i Kukësit dhe Gentian Mezani i Flamurtarit kanë zënë tri herë vendin në formacionin më të mirë të javës. I pari ka meritën kryesore, pasi skuadra e tij është shpallur kampione dimri dhe ka arritur të fitojë për momentin garën për vendin e parë me Partizanin dhe Skënderbeun.
Ndërsa Mezani, edhe pse nuk ka drejtuar që nga fillimi vlonjatët, mes problemeve financiare ka arritur të motivojë lojtarët e tij dhe t’i nxjerrë vlonjatët nga fundi i tabelës së klasifikimit. Megjithatë, balotazhin e stolit këtë herë e fiton Gjoka, pasi drejton ekipin që kryeson renditjen dhe është më afër titullit kampion./panoramasport
