Ish-drejtori i Arkivave në Ministrinë e Brendshme, Kastriot Dervishi, ka postuar në profilin e tij në faceboook, historinë e përndjekjes dhe arrestimit të Pjetër Arbnorit dhe kush ishte oficeri i Sigurimit me katër klasë shkollë, marangozi që e arrestoi.
Postimi i plotë
Në vitin 1961 kur Pjetër Arbnori u arrestua, oficeri i Sigurimit që u mor me zbulimin e ndjekjen e grupit të tij ishte kapiten Sotiri nga Shtika e Kolonjës. Karakteristika e tij formulohen nga të dhëna interesante. Ishte me vetëm 4 klasë fillore. Me profesion bujk, shofer e marangoz. Deri në vitin 1942 kishte shërbyer në ushtrinë fashiste. Në vitin 1945 me ardhjen në fuqi të “pushtetit popullor” nis punën në organet e punëve të brendshme. Në vitin 1950 gradohet nëntoger. Në vitet 1956-1962 është shef i seksionit të 3-të në Degën e Punëve të Brendshme Durrës, kohë kur godet Pjetër Arbnorin. Karrierën e mbyll në vitet 1962-1966 si zëvendësdrejtor i shtëpisë së pushimit të oficerëve.
