Ai njihej si ushtari i Met Kananit. Dy vite më parë, Tonin Gjini (Armando Gjini) u arrestua si pjesë e grupit të baronit të drogës, Met Kanani në kuadër të operacionit ‘Precizioni’. Gjini u arrestua së bashku me 37 persona të tjerë, ndërsa u sekuestruan 8 ton drogë.
Në 6 maj të këtij viti arriti t’i shpëtonte një atentati me tritol. Në makinën ishte vendosur një sasi eksplozivi. Në atë kohë u raportua se lënda plasëse ishte vendosur në sedilje brenda makinës. Gjini tregoi atëhere se ai e kishte parkuar makinën poshtë pallatit. Ai i tha grupit hetimor se diktoi pakon e çuditshme, pasi po e shqetësonte diçka në shpinë.
Këtë të hënë, plumbat i morën jetën në qendër të qytetit. 48-vjeçari ka mbërritur në spital i pajetë me plagë të shkaktuara nga arma e zjarrit. Krismat janë dëgjuar edhe nga banoret e Rrëshenit të cilët janë përfshirë në panik.
“Grupi hetimor në vendngjarje vazhdon hetimet për zbardhjen e plotë të rrethanave të ngjarjes. Janë ngritur pika kontrolli si dhe po bëhet krehja e zones me qëllim kapjen e autorit”, njofton policia lokale. / Opinion.al
