Komisioni Qendror i Zgjedhjeve do të shqyrtojë ditën e mërkurë rezultatet e verifikimit të Prokurorisë së Përgjithshme për mandatin e një anëtari të këshillit Bashkiak të Kamzës.
Konkretisht bëhet fjalë për Mirush Osman Dema (Troci) për të cilin KQZ ka kërkuar më parë verifikim nga Prokuroria e Përgjithshme. Kjo kërkesë erdhi pasi Dema dhe disa anëtarë të tjerë të këshillave bashkiakë kanë deklaruar dënime jashtë vendit, por që vetë komisioni nuk mund t’i verifikojë në shtete të huaja.
Mirush Dema ka deklaruar një ndalim për verifikim në Gjenevë, dhe dëbim në Suedi e në vendet e BE-së deri në tetor 2019.
Por Prokuroria e Përgjithshme i kërkon KQZ-së që t’i heqë mandatin këtij këshilltari pasi nga verifikimet e sektorit të Dekriminalizimit në Prokurorinë e Përgjithshme ka rezultuar se Dema ka fshehur dy dënime në Zvicër.
Sipas njoftimit të KQZ, në mbledhjen që do të zhvillohet ditën e mërkurë në orën 13:00, në zbatim të ligjit nr.138/2015 ”Për garantimin e integritetit të personave që zgjidhen, emërohen ose ushtrojnë funksione publike” do të shqyrtohen verifikimet e Prokurorisë. /Opinion.al
