Dejan Loy, 42-vjeçari serb, është bodigardi i biznesmenit qipriot që u ekzekutua nga shqiptarët rreth dy javë më parë në Qipro.
Bodigardi serb është njëri ndër 6 të arrestuarit, ndaj të cilit ka dyshime të forta se u ka dhënë informacione vrasësve shqiptarë. Është pikërisht personi në foto, serbi që mendohet se ka ndihmuar shqiptarët, raporton mapo.
Dejan Loy kishte filluar kohët e fundit punë si bodigard i biznesmenit qipriot që u ekzekutua dhe gjatë ekzekutimit, dëshmitarët panë veprime të dyshimta të tij.
Pak para se shqiptarët mbërritën para restorantit dhe të hapnin zjarr ndaj biznesmenit, bodigardi serb i tij u largua për në tualet dhe tha se po fliste në telefon me një femër.
Policia qipriote mendon se ai është paguar me një shumë të madhe parash nga shqiptarët për t’u dhënë atyre informacione. Për këtë arsye, policia i ka sekuestruar celularin për të analizuar thirrjet dhe po kontrollon llogarinë e tij bankare.
