Ai është ish-kryeministri miliarder, që jeton në një vilë prej xhami dhe metali, me pamje mbi kryeqytetin gjeorgjian, që e bën edhe Scaramanga-n të skuqet.
Njihuni me Bidzina Ivanishvilin, i cili edhe kur nuk përpiqet të bindë opinionin publik në emisionin e themeluar prej tij, në televizionin e të birit, një rapper albino, ai sërish tërheq të gjitha fijet e qeverisë në vendin ish-komunist.
59-vjeçari e ka bërë pasurinë e tij prej 5.2 miliardë dollarë si një oligark në kaosin që pasoi shembjen e Bashkimit Sovjetik.
I apasionuar pas kafshëve, siç transmeton mapo, ai ka premtuar se do ndihmojë qeverinë për të mbledhur kafshët e kopshtit zoologjik të Tbilisit, pas përmbytjeve katastrofike të javës së shkuar.
Kopshti thuajse u shkatërrua plotësisht më 13 qershor dhe kafshët u arratisën. Tre punonjës të kopshtit u vranë.
“Nuk e kam pëlqyer kurrë se në ç’gjendje ishte Kopshti Zoologjik në Tbilisti. Madje kam përgatitur një projekt për këtë qëllim. I kam premtuar qeverisë asistencë për financimin e kopshtit zoologjik, për të lejuar që kafshët të jetojnë në një ambient normal”.
Ai nisi të ndërtojë pasurinë e tij duke shitur kompjutera dhe importuar telefona në Rusi, përpara se të zhvendosej në biznesin e metaleve, bankave, hotelerisë dhe ilaçeve.
Më vonë u zhvendos në vendin e tij, në vitin 2003, me një pasuri personale që e kalon gjysmën e të gjithë prodhimit të brendshëm bruto të Gjeorgjisë.
Për vite të tëra ai ishte miliarderi i padukshëm, njeriu që nuk fotografohej dhe intervistohej thuajse kurrë.
Por gjithçka ndryshoi në vitin 2011, kur Ivanishvili vendosi të garojë për kryeministër, duke sfiduar ish- mikun e tij dhe favoritin e Perëndimit, Mikhail Saakashvili.
Në atë kohë ai tha se kjo ishte një thirrje e mëmëdheut.
“Këta e kanë vrarë demokracinë, kanë hequr qafe median dhe nuk lejojnë zërat kritikë. Është një qeveri autoritare, me tendencë për t’u bërë diktatoriale”.
Duke qenë se ishte popullor për shkak të filantropisë, kjo e ndihmoi. Ai thuhej se në një rast ua paguante rrogat punonjësve të kulturës, kurse në një rast tjetër dha 10 milionë dollarë për ndërtimin e katedrales së Tbilisit.
Në fshatin e tij të lindjes, Chorvita, ai ndërtoi shtëpi, rrugë e madje u jepte para cash si një lord feudal. Banorët merrnin 80 sterlina në muaj dhe të sapomartuarit fitonin 1200 sterlina si dhuratë, përveçse u paguante ceremonitë martesore.
Qeveria e Saakashvili-t iu kundërvu, i hoqi nënshtetësinë, në përpjekje për të penguar kandidimin e tij, i sekuestroi miliona si pjesë e një fushate kundër pastrimit të parave.
Ivanishvili ia doli të fitonte dhe shumë shpejt ishte i lumtur që po priste politikanët dhe gazetarët në vilën e tij me vlerë 30 milionë sterlina, 10 mijë metra katrorë, në kodrën që sheh mbi Tbilisin.
Vizitorët priteshin nga një ndihmës, që theksonte: “Mirësevini në shtëpinë e James Bond”.
Kompleksi, i dizenjuar nga arkitekti japonez, Shin Takamatsu, ka dy kate vetëm me xham dhe një pistë për helikopter në çati.
Vila ka një pishinë të brendshme dhe një të jashtme, si dhe një top gjigand argjendi mbi ujë.
Në kopsht ka skulptura të paçmuara të Henry Moore, Damien Hirst.
Koleksioni i artit i tij shkon në 1 miliard dollarë, përfshirë këtu punime të Picasso.
Ivanishvili është një koleksionist i madh dhe ishte blerësi anonim i pikturës “Dora Maar With Cat” të Picasso-s me një vlerë 95.2 milionë dollarë.
Përveç kësaj ai njihet për pasionin për kafshët ekzotike. Ai mban dhjetëra zebra, peshkaqenë, pinguinë flamingo dhe papagaj në shtëpinë e tij verore në bregun e Detit të Zi.
I lindur në varfëri, babai i katër fëmijëve e nisi si pastrues në një fabrikë, përpara se të bënte pasurinë.
Ai ka tre djem, dy prej tyre albino. Një prej tyre është një rapper i njohur dhe bodybuilder me 50 mijë ndjekës në Instagram.
20-vjeçari, të cilit i referohen edhe si Ëndrra Gjeorgjiane, publikoi një këngë me të njëjtin titull, për të mbështetur babain në zgjedhje. Jo më kot ai drejton edhe partinë Ëndrra Gjeorgjiane.
Ivanishvili e drejtoi Gjeorgjinë për më shumë se një vit, nga tetori 2012 deri në nëntor 2013, përpara se të largohej me pretendimin se e kishte përfunduar punën e tij për të reformuar politikën në Gjeorgji.
Ai vendosi në krye të qeverisë 31- vjeçarin Irakli Garibashvili, që ishte ministër i Brendshëm, dhe u tërhoq nga politika.
Por ai vazhdon të jetë një forcë e madhe pas skenës- disa herë edhe hapur.
Së fundmi ka nisur një talk show të titulluar ‘2030’- viti kur ai mendon se demokracia europiane dhe pasuria do të sundojë në Gjeorgji. Programi transmetohet në televizionin e të birit, GTV, i ngjashëm në stil me MTV-në. Ai braktisi idenë fillestare për ta drejtuar emisionin dhe tani shfaqet si i ftuar me raste.
Televizioni shihet si rivali i televizionit më popullor në vend, Rustavi2, një stacion të cilin Ivanishvili e quan makineri gënjeshtrash, që drejtohet nga ish-presidenti Saakashvili dhe njerëzit e tij.
Ndërkohë që monedha vendase ka rënë në mënyrë alarmuese me 30 përqind, Ivanishvili po mbështet një ligj që i heq bankës qendrore fuqitë rregullatore.
Dhe ai vazhdon të jetë në ndjekje të armikut të vjetër, Saakashvili, që tani është këshilltar i presidentit ukrainas, Petro Poroshenko.
Ukraina ka refuzuar kërkesën e Gjeorgjisë për ekstradimin e ish- presidentit, që akuzohet në shtëpi për abuzime me pushtetin gjatë kohës që ishte kryeministër në vitet 2004-2013.
