Turma të mëdha njerëzish mbushën sot rrugët e kryeqytetit iranian, Teheranit për funeralin e komandantit ushtarak iranian, Qasem Soleimani.
62-vjeçari, i cili drejtonte forcat elitë Quds, u vra në një sulm ajror amerikan me urdhër të Presidentit, Donald Trump.
Sulmi u krye në orët e para të ditës së premte kur Soleimani sapo kishte mbërritur në Bagdad pas një fluturimi nga Siria, kur katër predha me precizion të lartë goditën dy makinat ku ndodheshin ai dhe eskorta e tij.
Udhëheqësi Suprem i Iranit, Ayatollah Khamenei është fotografuar duke qarë, ashtu si mijëra njerëz të tjerë, ndërsa të shumtë ishin ata që mbanin në duar foto të komandantit të vrarë dhe thërrisnin “Vdekje Amerikës”.
Irani është zotuar për hakmarrje të ashpër ndaj Shteteve të Bashkuara dhe të dielën njoftoi se nuk do t’i përmbahej më kufizimeve të programit bërthamor, sipas marrëveshjes së vitit 2015.
Sipas SHBA-së Soleimani ishte një terrorist dhe e justifikuan vrasjen e tij me pretendimin se Soleimani po planifikonte sulme ndaj diplomatëve dhe personelit amerikan. Gjenerali do të varroset në vendlindjen e tij Kerman, ditën e martë./Opinion.al
