Emri i shqiptarit që përmendet nga dokumentet e publikuara të Panama Papers është Ismail Mulleti. Opinion.al ka siguruar një foto të tij.
Ismail Mulleti është një emër me një histori të gjatë në Shqipëri. Ai njihet si i përfolur për lidhje me kompaninë “Shqiponja” shumë afër PD, gjatë viteve 19921996, dhe bizneseve të tjera të afërta me PD.
Emri i tij vjen si ortak i një avokati të njohur izraelit, Assaf Halkin. Ky i fundit është i përfshirë në të paktën tre biznese në Shqipëri, bashkë
me Ismail Mulletin. Këta dy biznesmenë figurojnë si aksionerë në kompaninë që mori me koncesion ngjyrimin e karburanteve në Shqipëri.
Është pikërisht “GFI Albania” ajo që zbuloi emrin e Ismail Mulletit në listën e dokumenteve të skandalit financiar.
ZBULIMI I SHQIPTARIT
Media izraelite “Haaretz”, e cila ka akses në dokumente, ka zbuluar se pas Halkin ka një kompani “offshore”, e cila po punon në Shqipëri. “Një tjetër kompani e Halkin është ‘GFI Technologies’. Ajo është regjistruar në maj të vitit 2013, në ishullin e Anguilës, në mënyrë që të investojë në Shqipëri. Sipas dokumenteve, Halkin, një qytetar shqiptar i quajtur Ismail Mulleti dhe një firmë kanadeze, “Global Fluids International S.A”, janë pronarë të kompanisë”, thuhet në shkrimin e “Haaretz”.
Kompania “GFI” është fituesja e koncesionit të markimit të karburanteve në Shqipëri. Datat përkojnë pasi kontrata është lidhur me kompaninë në fund të mandatit të qeverisë Berisha. Bëhet fjalë për një koncesion që do të zgjasë 10 vite, me një përfitim prej rreth 150 milionë eurosh. Llogaritet se për çdo litër karburant, 2 lekë janë kosto e ngjyrimit. Koncesionari mbahet mend së fundmi për përplasjen me qeverinë shqiptare lidhur me ngjyrimin e naftës bruto. Para disa muajsh pati një bllokim të punës në porte, por Financat arritën të gjenin gjuhën me kompaninë dhe e zgjidhën mosmarrëveshjen.
LOJËRAT ME KONCESIONIN
Sipas të dhënave të QKR, “GFI Albania”, e cila ka fituar koncesionin e ngjyrimit të karburanteve, ka dy aksionerë. Në vitin 2013, “Global Fluids International” kishte 75% të aksioneve dhe “Petrolium Consulting Partners” 25% të aksioneve. Në shtator të vitit të kaluar “GFI” tërhiqet dhe mban vetëm 0.07%. Por në dokumente ka një gjë të habitshme.
Përfaqësuesi i “Petrolium Consulting Partners” është pikërisht izraeliti Halkin. Duke iu referuar të dhënave të gazetës izraelite, duket se i gjithë konsorciumi për koncesionin e naftës është rrotulluar vetëm rreth këtij emri. Dhe partneri shqiptar duket se ka qenë shumë afër pushtetit të PD, ndër vite.
PARTNERI, MULLETI
Po kush është partneri shqiptar i izraelitit Halkin? Ismail Mulleti ka një bashkëpunim të fortë me Halkin. Emri i tij nuk shfaqet vetëm pas
koncesionit të karburanteve. Në Shqipëri ata kanë biznese të përbashkëta, që nga konsultimi e deri te shitblerja e pronave të patundshme.
Ismail Mulleti figuron si aksioner i përbashkët me Assat Halkin në kompaninë “IMAH 2014”. Kjo kompani e krijuar më 17 shkurt 2014, ka si
aksionerë Ismail Mulletin, me 45% të aksioneve, Assat Halkin, me 45% të aksioneve, dhe Entela Shehaj, me 10% të aksioneve.
Kompania ka si objekt aktiviteti të gjitha format e tregtisë, shërbimeve të konsulencës, të sigurisë, madje edhe të menaxhimit të burimeve
njerëzore. Kompania figuron aktive. Një tjetër bashkëpunim biznesi mes Mulletit dhe Halkin është kompania “Supreme real estate corporation”, e krijuar më 18 shtator 2008. Këtu përfshirja nuk është direkte. Kompania ka si aksionerë Halkin, me 3.33%, “Geb International Inc”, me 3.33%, “Globstrat Finance Inc”, me 90%, dhe “Gravitas Albania Partners”, me 3.33%.
Por në kompaninë e fundit “Gravitas Albania Partners”, aksioner i vetëm është pikërisht Ismail Mulleti. Edhe këtu bie në sy lidhja me vendet
“offshore”. Aksionerja më e madhe e kompanisë është “Globstrat Finance Inc”, me 90 për qind të aksioneve, kjo e regjistruar në ishujt Virxhin. Duket qartë që Ismail Mulleti dhe Assat Halkin kanë njohje të vjetra dhe bashkëpunim të fortë biznesi.
Të paktën që nga viti 2008, kur nisën bashkëpunimin në tregun e pasurisë së paluajtshme. Më pas, ky bashkëpunim duket se ka finalizuar me superbiznesin prej 150 milionë eurosh të ngjyrimit të karburanteve.
Habitshëm, gjithmonë bizneset kanë lidhje me vendet “offshore”, ku
kontrolli i pasurisë, taksave apo mënyrës së fitimit është gjithmonë i “ruajtur mirë”.
