Një foto nga ato që nuk kemi shansin t’i shohim përditë. është një imazh i vitit 1937, që tregon procesin e vajtimit të një burri të vdekur, në zonën e Thethit.
Ky proces vajtimi, që quhej ndryshe edhe rituali i gjëmës kryhej mbi dy dërrasa të shtruara pranë një peme. I vdekuri vendosej mbi to, së bashku me të gjitha sendet e veta. Gratë e fisit rregullojnë edhe një herë petkat e të vdekurit, ndreqin pëlhurën e kokës dhe përzënë mizat me tufën e fierit. Pastaj disa burra fillojnë të gërmojnë varrin.
Dymbëdhjetë burra ndërkaq qëndrojnë mënjanë. Pothuaj nja njëqind metër larg ata radhiten në dy radhë përballë njëri-tjetrit. Prijësi në mes. Ai përthyen pak gjunjët, mbushet me frymë. Fillon gjama e anëtarëve të fisit. Një ofshamë e lartë: “Mjeri, -o, o, vëllathi em, mjeri -o, o, eh, eh!”. Thirrja përsëritet me zë të lartë dhe të fortë. Gjama shoqërohet me gjeste: rrihet kraharori, gërvishten tëmthat.
Fotoja është realizuar nga antropologu Raimer Shulc dhe është publikuar nga studiuesi Robert Elsie, i cili e ka Shqipërinë në fokus të disave nga punët e tij.
