Teksa po i bashkohet protestës së opozitës deputetja e Partisë së Lirisë, Monika Kryemadhi, ka dhënë një deklaratë për mediat. Ndër të tjera gjatë fjalës së saj Kryemadhi komentoi një foto të publikuar në media ku shfaqej kreu i Partisë së Lirisë, Ilir Meta duke darkuar me ‘Personin B’ të dosjes së Washingtonit për Mc Gonigal Dorian Duçka.
Kryemadhi tha se fotografitë e vjetra nuk e shpëtojnë Edi Ramën.
“Më bëhet shumë qejfi që djali i hallës së Ilir Metës ka nxjerrë arkivin e 2013 ku Ilir Meta ishte në një takim me ambasadorin kinez. Ducka mori pjesë si zëvendës ministër. Pjesë që shoqërohet në një takim zyrtar. Pashë dhe foton në avion, mua më ka rënë të jem në avion me disa që ekstradohen nga Anglia. Fotografitë e vjetra nuk e shpëtojnë Edi Ramën sepse as Ilir Meta, as Shkëlzen Berisha, as Sali Berisha nuk kanë paguar para për të korruptuar agjentin e FBI-së.
Ditë të shtune dhe ditë pushimi nuk ka protestë, ka manifestim. Protestë ka kur ne deputetët rrimë brenda në parlament dhe qytetarët jashtë dhe i kapim si miu në çark”, tha Kryemadhi.
