TIRANE- Një takim informal është zhvilluar sot mes Edi Ramës dhe liderit i AAK-së, Ramush Haradinaj në Tiranë. Në fakt nuk ka qenë vetëm një takim, por një drekë siç e dëshmojnë edhe këto foto me gotat e verës në tavolinë. Asnjë njoftim zyrtar nuk ka për këtë takim që vjen në një kohë të tensionuar për politikën në Kosovë. Atje opozita, përfshirë edhe Ramushin kërkon largimin e qeverisë Mustafa.
I vetmi që ka folur për mediat kosovare ka qenë deputeti i AAK-së, Pal Lekaj i cili ka qenë edhe pjesë e kësaj tryeze. Sipas tij, takimi i sotëm mes Haradinajt e Ramës ka qenë i rastësishëm. “Jo nuk kemi ardhur me ftesë, jemi takuar rastësisht”, ka thënë Lekaj.
Ai më pas ka theksuar se gjatë këtij takimi nuk është folur për krizën politike në vend. “Ne ishim në takim miqësor, nuk kishte agjendë politike”, tha Leka, duke shtuar më pas se ai së bashku me Haradinajn janë takuar edhe Ilir Metën dhe shumë personalitete të politikes shqiptare në ditëlindjen e Fahri Ballës.
