Një tjetër gomone me drogë është kapur nga autoritetet italiane, pas një njoftimi nga pala shqiptare.
Pak pas mesditës (dje), Qendra Ndërkombëtare Operacionale Detare në Durrës, ka njoftuar për një mjet që lëvizte me shpejtësi nga perëndimi në drejtim të kepit të Rodonit. Policia shqiptare doli në kontroll, ndërsa u njoftuan dhe autoritetet italiane.
Rreth orës 19.00, pas 6 orësh ndjekje, në momentin e hyrjes në ujërat italiane u identifikua dhe ndalua mjeti i lundrimit me dy persona në bord dhe me ngarkesën me lëndë narkotike prej 533.5 kilogramë.
Drejtuesit e mjetit ishin dy shtetas italianë A.M, 38 vjeç dhe A.C, 60 vjeç, të dy nga Brindisi.
Po një ditë më parë, një i ri u ndalua në zonën e Kepit të Rodonit, ndërsa kishte ardhur nga Vlora me një furgon me kanabis. Policia thotë se tani trafikantët nuk po nisen më nga Vlora, duke ndryshuar strategji. /tvklan.al
