Një prej stadiumeve më të famshëm në botë do të ndërrojë pamjen. Presidenti i Realit të Madridit, Florentino Perez, prezantoi në Bashkinë e Madridit projektin e stadiumit të ri “Santiago Bernabeu” për një rikonstruksion total të impiantit të galaktikëve. Nuk do të ketë një shtim të kapacitetit, por një ridizenjim për të sjellë elementë modernistë, të cilat e dërgojnë në total koston e rindërtimit të tij në 400 milionë euro.
Punimet do të nisin në vitin 2017 dhe do të financohen nga një sponsor, i cili do të vendosë edhe emrin e tij. Tavani dhe tribunat do të mbulohen plotësisht, ndërkohë që mbulesa do të studiohet që të bëhet e lëvizshme. Muret e jashtme do të përbëhen me mijëra ndriçues LED, në të cilët do të transmetohen ndër të tjera edhe filma dhe do të shërbejë si një ekran gjigant.
Nga rindërtimi i “Bernabeut” do të përfitojë edhe urbanistika e qytetit. Shëtitorja “Kastejana”, e cila sot është një parking, do të shndërrohet në një shesh publik, pedonale, që do të mbledhë tifozët përpara hyrjes në stadium. Edhe muzeu i klubit do të ristrukturohet, ndërkohë që zyrat do të transferohen në qendrën stërvitore “Valdebebas”.
Këshilli Bashkiak e miratoi pjesërisht projektin e klubit, duke refuzuar që të ndërtohej edhe një hotel dhe një qendër tregtare. Kryebashkiakja e Madridit, Manuela Karmena, vendosi veton për të ndërtuar dhe integruar brenda stadiumit hotelin dhe qendrën tregtare, të cilat presidenti Perez dëshironte që t’i përfshinte në projekt për të rritur përfitimet financiare.
