Themeluesi i Lëvizjes “Zgjidhja” brenda PS, Koço Kokëdhima u takua sot në orën 12.00, me kreun e Partisë Agrare Ambientaliste Agron Duka. Takimi kokë më kokë në hotelin “Rogner” zgjati rreth 45 minuta. Duke iu përgjigjur interesimit të medias, Kokëdhima u shpreh se “takimi me z.Agron Duka ishte një kafe miqësore, sepse ne jemi miq te hershëm. Por ishte një mundësi për të shkëmbyer pikëpamjet tona për situatën politike”.
Kokëdhima ka nisur prej nëntorit të vitit 2016 bashkëbisedimet me bazën e PS-së për të prezantuar lëvizjen “Zgjidhja” e cila synon të reformojë dhe modernizojë PS-në si dhe të heqë partitë nga sundimi i kryetarëve.
Ndërsa Agron Duka, ish-ministër i Bujqësisë në kohën e kryeministrave Meta dhe Nano drejton PAA-në e cila është aleate në PD-në e drejtuar nga Lulzim Basha.
Takimi zhvillohet në kohën kur opozita proteston dhe Duka është angazhuar për gjetjen e mbështetësve të kauzës “qeveri teknike” edhe jashtë PD-së. /Opinion.al
