Një aksident me vdekje ka ndodhur ditën e sotme në aksin rrugor Pogradec-Korçë. Mësohet se një trajler ka përplasur një makinë dhe për pasojë ka mbetur i vdekur drejtuesi i saj. Aksidenti ndodhi në fshatin Petrushë të Korçës, ndërsa deri më tani ende nuk janë të qarta shkaqet e aksidentit.
Po këtë të enjte, në mëngjes, një grua e moshuar humbi jetën në një aksident në Qafë-Thanë. Përplasja mes një trajleri dhe një minibusi ka sjellë vdekjen e menjëhershme të 85-vjeçares Resmije Hyskaj. Ajo ishte pasagjere në minibusin e linjës së Korçës kur ky mjet u godit nga një trajler teksa ngjiste Qafë-Thanën.
Trajleri i drejtuar nga shoferi me iniciale A.H banues në Durrës, sipas policisë, ndikuar nga lagështira është përplasur me minibusin që drejtohej nga shtetasi Th.K. banues në Elbasan. Veç viktimës, mbetën të plagosura edhe dy pasagjere të tjerë të minibusit.
Pogradec, njoftimi i policisë
Më datë 03.10.2019, në orën 12.30, në aksin rrugor Korçë-Pogradec, pranë fshatit Petrushë, janë përplasur mjeti tip “Benz” (me targa greke), me një mjet tip kamion, me drejtues shtetasin F.M, 47 vjeç, banues në fshatin Bulgarec, Korçë. Për pasojë ka gjetur vdekjen drejtuesi i mjetit, tip “Benz” (ende i paidentifikuar). Grupi hetimor në vendin e ngjarjes, po punon për të zbardhur rrethanat e ngjarjes dhe përcaktuar shkaqet e aksidentit./ Opinion.al E.Xh.
