Një foshnjë e porsalindur në Angli ka rezultuar pozitiv nga korona virusim duke u bërë kështu pacienti në moshën më të re, prekur nga ky virus. Lajmi bëhet me dije nga “The Sun”, që raporton se në fakt nëna e fëmijës ishte gjithashtu e prekur nga ky virus, por këtë fakt e ka mësuar vetëm pasi ka sjellë në jetë fëmijën.
“Nëna e fëmijës u dërgua në spital ditë më parë me dyshimet për pneumoni, por rezultati se ishte pozitive me koronavirus u bë i njohur vetëm pas lindjes. Nëna dhe foshnja po trajtohen në spitale të ndara. Foshnja po trajtohet në spitalin “North Middlesex” ku lindi, dhe nëna po zhvendoset në një spital të specializuar për infeksione”, shkruan The Sun.
Duke qenë se deri më sot, nuk kishte të dhëna për transmetimin e virusit nga nëna tek fetusi, mjekët po përpiqen të përcaktojnë se si foshnja është prekur nga virusi.
Aktualisht stafi mjekësor që ka qenë në kontakt me nënën dhe fëmijën e saj do të izolohet.
Ekspertët besojnë se gratë shtatzëna dhe foshnjat janë në rrezik të ulët nga koronavirusi dhe ka të ngjarë të kenë vetëm simptoma të lehta. Numri I personave të prekur nga koronavirusi në Britaninë e Madhe ka arritur në 798 persona, ndërsa janë shënuar 11 viktima./Opinion.al
