Materniteti “Koço Gliozheni”, ka publikuar shkaqet e vdekjes së foshnjës, që u gjet një ditë më parë e braktisur në garazhin e një pallati në Yzberisht të Tiranës.
Në një njoftim për mediat, materniteti “Koço Gliozheni”, thotë se për 24 orë është luftuar fort nga ana e stafit mjekësor për të fituar betejën për jetën e kësaj foshnjeje por fatkeqësisht kjo nuk u arrit.
Njoftimi i Maternitetit “Koço Gliozheni”
Ashtu siç jeni njoftuar gjatë gjithë ditës së djeshme, pranë SUOGJ “Koço Gliozheni”, është sjellë në gjendje të rëndë traumatike, një foshnjë e lindur dhe e braktisur në ambjentet e një garazhi !
Me të mbërritur në spital foshnjës i është dhënë ndihma e parë në reanimacionin neonatal dhe pas shumë përpjekjesh është arritur të kthehet në jetë edhe pse në gjendje të rëndë!
Për 24 orë është luftuar fort nga ana e stafit mjekësor për ta fituar betejën për jetën e kësaj foshnjeje. Pavarësisht punës, përpjekjeve dhe dëshirës së madhe për fat të keq kjo gjë nuk u arrit!
Me hidhërim të thellë njoftojmë humbjen e jetës së foshnjës!
Foshnja ndërroi jetë në orën. 10:45, datë 09.11.2023
Diagnozat klinike:
Lindje në term/ Lindje per vias vaginalis/ Hipotermi e thellë/Politraumë/ Hemorragji pulmonare/Insufiçience multiorganore/Arrest kardiorespirator
Falenderojmë Ministrinë e Shëndetësisë dhe Punës Sociale, Policinë e Shtetit si dhe të gjithë qytetarët që na kanë mbështetur fuqimisht në betejën tonë për jetën, që fatkeqësisht këtë herë e humbëm!
