Pavarësisht ecurisë pozitive makroekonomike, Fondi Monetar Ndërkombëtar në raportin e tij të fundit konstaton se Shqipëria përballet me dy nga sfidat kryesore, plakja e popullsisë dhe emigracioni. Sipas ekspertëve të ekonomisë këto dy sfida kanë nisur të japin efektet e tyre në Shqipëri, teksa pasojat do të jenë afatgjatë.
“Janë probleme që kanë lidhje me sfida strukturore të ekonomisë tonë dhe kanë të bëjnë si me problematikën që kanë krijuar në ekonominë aktuale dhe si do vijojë kjo me ato sfida që ka Shqipëria për integrimin europian. Problemi i emigrimit ka të bëjë me sfidat aktuale, tregun e punës dhe me shtimin e fuqise punëstore”, u shpreh Eduart Gjokutaj, eksperti i ekonomisë.
Po ku duhet të adresohen politikat e vendit përballë këtyre dy sfidave?
“Ndaljen e emigracionit për të patur një fuqi punëtore konkurruese dhe në ato familjare që kanë të bëjnë me rritjen e lindshmërisë të cilat në vetvete nuk janë të harmonizuara që të japin efektet e duhura”, tha eksperti.
Aktualisht nevojat e tregut për punonjës mbeten të larta. Zëvendësimi i tyre me fuqi punëtore të huaj shihet si një nga zgjidhje e biznesit. Por edhe kjo alternativë nuk po mbush boshllëqet e tregut të punës, kryesisht në hoteleri turizëm dhe ndërtim./ Tv Klan
