Sot ka nisur zbatimi i masave për ndalimin e qarkullimit të automjeteve private në qytetet më të mëdha të Shqipërisë në kuadër të parandalimit të përhapjes së koronavirusit. Kjo situatë ka kërkuar që forca të shumta policie të dalin në terren ku po garantojnë mbarëvajtjen e këtyre masave.
Por në 24 orët e fundit ka patur një fluks të pazakontë telefonatash në numrin unik 112 dhe ka patur raportime për pamundësi të arritjes së lidhjes me të.
Policia për këtë i ka bërë një thirrje qytetarëve që të racionohen thirrjet telefonike.
“Duke kërkuar mirëkuptimin e çdo qytetari dhe ndihmën e tij, apelojmë të racionohen thirrjet telefonike drejt 112, duke u lënë mundësinë të marrin shërbim atyre që kanë më tepër nevojë për ndihmë.
Kjo nuk është koha që për çdo pyetje informuese të telefonohet 112, të tilla si pamundësia e lëvizjes me mjet, me këmbë etj.
112 nuk është Salla Emergjente për sqarim pyetjesh, por për marrje denoncimesh apo shqetësimesh. Kjo merr një tjetër rëndësi specifike në këto momente.
Kufizimi dhe ndalimi i qarkullimit është një sakrificë që i ndihmon parandalimit të përhapjes së COVID-19 dhe kapërcimit sa më lehtë e shpejtë të kësaj situate”, thuhet në apelin e policisë. /Opinion.al
