Mbetet i lartë fluksi i qytetarëve shqiptarë të cilët pasi kaluan festat e fundividit në vendlindje po kthehen sërish në vendet e tyre të banimit në vendet fqinje.
Mbrëmjen e së mërkurës nga Porti i Durrësit drejt Portit të Barit kanë lundruar dy tragete, të cilët në total kanë transportuar 2432 pasagjerë.
Kapiteneria e Portit të Durrësit bën të ditur se deri më 7 Janar do të vijojnë lundrimet e dyfishta (vajtje-ardhje brenda ditës), të trageteve të linjave detare të cilat operojnë me portet e Italisë, pasi parashikohet të ketë rritje të udhëtarëve të cilët tashmë janë të përqëndruar në dalje të vendit.
Për përballimin e fluksit të pasagjerëve në dalje janë vënë në dispozicion 22 sportele operacionale.
I lartë mbetet numri i qytetarëve shqiptarë që kthehen edhe në Greqi. Kështu, në pikën e kalim it kufitar të Kapshticës në 24 orët e fundit kanë hyrë mbi 2700 shtetas dhe kanë dalë afro 5800 të tjerë.
Thuajse i njëjti fluks është regjistruar edhe në Kakavijë, ku në orët e fundit kanë afro 3100 persona dhe kanë dalë 5800 të tjerë.
Në pikën e kalimit kufitar të Qafë-Thanës që lidh Shqipërinë me Maqedoninë e Veriut raporti i hyrje daljeve është përmbysur, pasi në 24 orët e fundit kanë hyrë rreth 3600 persona dhe kanë dalë afro 3100./tvklan
