Florjan Binaj aktori mjaft i dashur për publikun, i njohur për rolet në programin e humorit “Portokalli”, dhe bashkëshortja e tij, Sadina ishin të ftuar sot në emisionin “Rudina” në Tv Klan, për të treguar historinë e tyre të dashurisë.
Ata janë takuar para 15 vitesh, teksa studionin në Liceun Artistik. Atëherë Flori ishte në vitin e fundit për pikturë, ndërsa Sadina në vitin e parë. Prej asaj kohe ata janë të pandarë, ndërkohë që sot janë prindër të dy fëmijëve, Krena dhe Glauk.
“Ka qenë një periudhë beqarie në Lice dhe doja diçka ndryshe nga lidhjet që kisha patur. Kur pashë Sadinën për herë të parë pata një ndalim dhe thashë kjo është. Përmbushte gjithçka që unë kisha në mendje për femrën që doja të kisha në krah. Momenti i propozimit ka ndodhur në kinema, ka qenë data 7 Prill 2004. Tashmë kemi dy fëmijë, të cilët na e mbushin shtëpinë plot lumturi. Unë përpiqem të qëndroj sa më pranë tyre. Gjëja e parë që kam thënë për gocën, pasi u bë 3-4 muajshe ishte: “Ku ke qenë më parë”.
Janë edhe gjërat e kundërta edhe ato të përbashkëta që na bëjnë ta duam njëri-tjetrin. Unë jam tip shumë implusiv dhe reagoj shumë shpejt, ndërsa Sadina është e përmbajtur. Nga ana tjetër, Sadina është nënë shumë e mirë me fëmijët, më ka ndihmuar shumë mua”, u shpreh aktori./E.M
