Arben Zaçi është njëri nga zjarrfikësit e plagosur rëndë që ishte ndër të parë që ndërhyri për të shpëtuar qytetarët në qendrën tregtare në Lushnje.
Sipas tvklan, ai ishte jashtë shërbimit në momentin kur ndodhi ngjarja dhe kur dëgjoi alarmin e shefit në radio vendosi të ndërhynte me ato mjete rrethanore që i gjendeshin.
Në një prononcim për mediat, Zaçi tregon momentet e para të ndërhyrjes, deri kur humbi ndjenjat si pasojë e tymit.
Por sot ai është në gjendje të mirë, dhe siç thotë, ndihet më mirë kur nuk ka dëme në njerëz.
”Ishte një nuse këtu, kishte 2 fëmijët. Tha “kam 2 fëmijët në kat të 7-8, atje u ndeshëm me një xhaje ngaqë ishte tymi shumë…Morëm vesh që s’kishte më njerëz, u evakuuan lart njerëzit, zbritëm dhe nuk mbaj mend gjë fare pastaj se u bllokuam
Ishim rastësisht se nuk ishim në punë, nuk ishim në ditën e shërbimit. Morëm vesh që dha shefi alarm dhe u ngjitëm me çfarë mundëm, bëmë çfarë mundëm. Çfarë ishin varur njerëzit i zbritëm”, u shpreh ai.
Gazetarja: Sa vjet ke punë zjarrfikës, ka qenë kjo situata më e keqe?
Zjarrfikësi Arben Zaçi: Jo jo kjo ishte më e keqja. 17 vjet që kam punë kjo është më.. Na ruajti Zoti. Kur s’ka dëme në njerëz jemi më mirë. Kjo është puna jonë që mos të ketë dëme në njerëz.
Gazetarja: Dëgjoje të thirrura për ndihmë?
Zjarrfikësi Arben Zaçi: Po kishte njerëz që po bërtisnin. Kishte shumë njerëz që po bërtisnin. Sa zbrita te kati i parë, ishte dhe policia, s’mbaj mend më gjë fare. Na ruajti Zoti.
Zjarri përfshiu dje qendrën tregtare në Lushnje dhe disa kate banimi mbi të.
Me ndërhyrjen e zjarrfikësve, forcave të policisë dhe ushtrisë u arrit që të evakuoheshin të gjithë banorët ndërsa beteja me flakët zgjati deri pas mesnate kur u vendosën nën kontroll.
