Një 42-vjeçar humbi jetën mëngjesin e sotëm në fshatin Vërdovë të Pogradecit pasi banesa e tij u përfshir nga zjarri.
Nikolin Xhukellari, vëllai i viktimës ka treguar për mediat detajet e ngjarjes së rëndë. Ai shprehet se vëllai i tij jetonte vetëm në katin e dytë të banesës.
Xhukellari thotë se ngjarja ka ndodhur rreth orës 4 të mëngjesit, ndërsa shton se flakët kishin përfshirë të gjithë dhomën dhe se ai nuk kishte mundur të futej e të shpëtonte vëllain.
Ai thotë se pasi konstatoi zjarr në katin e dytë të banesës, ka nxjerr familjarët e tjerë jashtë banesës të cilët ndodheshin në katin e parë.
Xhukellari thotë se ka telefonuar zjarrfikësit, por ata janë vonuar për shkak të ngricës.
“Nga ora 4 e mëngjesit më zgjon nusja dhe më thotë; çohu se po bëhet zhurmë. Kur hapa derën shoh katin e dytë që ishte kapluar nga flakët. Lartë banonte vëllai, dhoma e tij ishte mbushur me zjarr. Nuk bëmë dot gjë që të shpëtonim vëllain. Mora fëmijët dhe nusen dhe dolëm direkt jashtë, s’morëm dot asgjë tjetër. Morëm pastaj në telefon policinë dhe zjarrfikësit. Punonjësit e zjarrfikëses erdhën në këmbë, pasi makina e zjarrfikëses nuk vinte dot, pasi gomat xhironin nga ngrica. As rroba për fëmijë s’kemi, i kemi marrë zbathur. Mendoj se zjarri ka ardhur nga korrenti, ka bërë ndonjë masë. Instalimet ishin të reja. Lart kati i dytë nuk i kishte instalime të reja, ka qenë pakujdesi e vëllait, pasi ai nuk ishte dhe mirë, ishte i pafuqishëm nga shëndeti”, -tha vëllai i viktimës./ Opinion.al
