Nga Suada Daci
Pak minuta më parë ju treguam se hiti shqiptar, “Të ka lali shpirt”, është një nga këngët më të klikuara ndonjëherë në industrinë e muzikës shqiptare.
Projekti i këngëtares së talentuar vlonjate, Silva Gunbardhi (i publikuar tre vjet më parë), duket se nuk e ka humbur shkëlqimin, duke u kthyer në një hit të përmasave botërore. Duke mos u mjaftuar me një lajm të thatë për suksesin e këngës shqiptare, Opinion.al ka kontaktuar me këngëtaren Silva Gunbardhi, e cila na ka thënë se ndihet shumë e lumtur për këtë fakt.
“Kënga merr 10 milion klikime çdo muaj, 180 milion klikime kishte në 25 prill dhe ja ku jemi sot, siç e keni venë edhe re edhe ju, ka më shumë se 190 milion klikime në You Tube. Ajo që më pëlqen dhe më motivon më shumë është që në You Tube mund të ketë këngë të këngëtareve shqiptar (si Rita Ora përshembull), por këngët e saj janë në anglisht ndërsa “Të ka lali shpirt” është në gjuhën shqip. Shumë fansa të mi (tashmë edhe në botë) e lidhin Shqipërinë me këngën “Të ka lali shpirt”, thotë këngëtarja simpatike për Opinion.al.
E pyetur nëse njerëzit vazhdojnë ta kërkojnë ende në koncertet e saj, ajo shprehet se nuk janë vetëm shqiptarët por edhe publiku i huaj (kur këndon në vende jashtë shtetit), që mezi pret ta dëgjojë këtë këngë.
Po çfarë e bën të suksesshme “Të ka lali shpirt”?!…
“Ndërthurja e rrymave e bën këtë këngë të suksesshme. Jam e bindur që nëse do të ishte vetëm tallava nuk do të kishte këtë popullaritet (pjesa ku këndon Mandi), ashtu sikundër nuk do të ishte kaq e pëlqyer dhe e famshme në rast se do të ishte pop, (Pjesa ime)”.
Silvën e kemi pyetur gjithashtu edhe për të ardhurat që fiton nga klikimet, pasi me atë shifër marramendëse klikueshmërie që kënga ka në You Tube, me siguri këngëtarja duhet të jetë bërë shumë e pasur.
“Sigurisht që fitoj edhe nga klikimet. Ne kemi një kontratë me Arkivën Shqip që menaxhon këngën në You Tube, ku marrim secilën pjesën e tonë. Nëse klikimet do bëheshin vetëm nga Shqipëria, Kosova, Maqedonia, etj nuk do të kishim të ardhura, por kënga klikohet në Zvicër, Gjermani, Turqi, Arabi, etj dhe kështu që të ardhurat janë të mëdha. Megjithatë leku nuk është asgjë përballë vlerës që ajo këngë ka për mua”…
E në fakt “Të ka lali shpirt” ka edhe vlerë shpirtërore për Silva Gunbardhin, pasi gjatë këtij projekti ajo u lidh edhe me bashkëshortin e saj, Dafi Derti. Ata janë sot prindër të një djali të bukur, të cilin e kanë quajtur Dalvi. Dalvi është aktualisht 10 muajsh dhe është një nga fansat e vegjël të këngës “Të ka lali shpirt”.
“Dalvi është rritur tashmë dhe e vendos vetë këngën “Të ka lali shpirt”, thotë këngëtarja duke na treguar se së shpejti do të lançojë edhe dy këngë të reja. Njëra do të jetë bashkëpunim dhe tjera solo.
