Shpëtim Meta dje ka provuar tmerrin. Për disa orë me radhë ai nuk e ka ditur se ku e kishte të birin 10 vjeç. Fëmija ishte nisur në mëngjes për në shkollë me furgon dhe në drekë nuk ishte kthyer në shtëpi. Shoferi u kishte thënë prindërve se “e kam lënë para shkollës”, nga ana tjetër mësuesja u kishte thënë se “nuk ka qenë në mësim”. Të alarmuar prindërit kanë nisur kërkimet, gjithashtu e kanë denoncuar humbjen e fëmijës edhe në mediat sociale. Në një rrëfim për portalin Newsbomb.al, Shpëtim Meta ka thënë se Nandi, kishte tentuar të kthehej në shtëpi por ka humbur rrugën.
“Me të zbritur në shkollën “4 Dëshmorët” në Tiranë djali ka hyrë në klasë, rreth 15 minuta para se të niste mësimin dhe kur ka hapur çantën ka vënë re që i mungonte një libër. Nga frika se mos mësuesja vinte dhe e gjente pa libër por dhe nga meraku që 10 vjeçari ka për shkollën, ka menduar të kthehet në shtëpi e ta marrë librin”, tha babai.
“S’donte që mësuesja ta gjente pa libër. Është një nxënës që e do shumë shkollën, shumë korrekt dhe i përgjegjshëm”, rrëfen më tej ai.
10-vjeçari gjatë rrugës për të shkuar në shtëpi, është ngatërruar nëpër rrugica dhe ka humbur. Pas disa orësh atë e ka gjetur një zotëri nga Tirana, i cili ka rrëfyer se e ka marrë vogëlushin dhe e ka futur në një lokal ku i ka ofruar edhe një çaj për t’u ngrohur, pasi siç i ka rrëfyer familjes, vogëlushi kishte ngrirë. Nga lokali, zotëria bashkë me djalin kanë përshkruar sërish rrugën e shkollës së Nandit dhe aty rastësisht janë takuar me familjarët e vogëlushit që e kërkonin të shqetësuar.
“U them prindërve të kenë shumë kujdes me fëmijët e tyre dhe faleminderit të gjithëve që u angazhuat për gjetjen e tim biri. Nuk di si t’ju falenderoj por edhe t’ju kërkoj ndjesë për gjithë shqetësimin”, shprehet i prekur babai i 10-vjeçarit.
