Martin Prela, i ati i punonjësit të FNSH-së Xhulio Prela i cili u ekzekutua me amrë zjarri në orët e para të mëngjesit të sotëm, ka folur për mediat.
Babai ka rrëfyer se ka takuar të birin mbrëmë dhe kanë darkuar së bashku, por më pas 26-vjeçari, Xhulio Prela, ishte nisur drejt Rinasit për të pritur një mik.
Ndërkohë, babai i tij përjashton mundësinë e përfshirjes në vrasje të mikut që i riu priti në Rinas. Martin Prela shprehet se nuk kishin hasmëri, por që i biri kishte disa presione për shkak të punës për çështjet që ishin mbyllur me kohë.
I ati rrëfen për një konflikit të Xhulios para dy vitesh, ndërsa shton se pikërisht për shkak të këtij problemi edhe ka kërkuar transferim në Shkodër. Sipas të atit, Xhulio Prela rreth orës 00:00 ka dal nga shtëpia, pasi në 01:00 do zbriste miku në Rinas.
“Lajmin e mora në 5 të mëngjesit nga nipi im. Më thanë ka bërë aksident nuk ma treguan të vërtetën. Pastaj kur u afruam më thanë që e kanë vrarë. Me djalin hëngrëm darkë, ishte i qetë. U zgjua herët e iku në Rinas mori një mikun e tij që vinte nga jashtë dhe e çoi në Shkodër. Kur u kthye për të ardhur në shtëpi ndodhi ngjarja. Jam i tronditur. Nuk e di nga se ka ardhur. Nuk kemi konflikte dhe as gjak me njeri. Djali ishte i fejuar. Ndoshta konfliktet janë të punës. Më ka thënë se para 2 vitesh ka pasur një përplasje me dikë në Lezhë, sepse djali ka zbatuar ligjin. Nga kjo kërkoi transferim në Shkodër. Mbase është ky konflikt, nuk e di. I bëj apel policisë ta zbardhë ngjarjen. Ta gjej kush ma vrau. Ai nuk ngjallet më, por është një lloj lehtësimi për mua”,- shprehet babai i Xhuljo Prelës.
Xhulio Prela u qëllua me armë në aksin rrugor Milot-Lezhë në vendin e quajtur Gajush, nga persona ende të pa identifikuar. Dyshohet se Prela ka marrë një telefonatë dhe më pas është larguar në drejtim të Lezhës, ku dhe është qëlluar me armë për vdekje.
Po ashtu, dyshohet se 26-vjeçari i ka njohur autorët pasi një prej xhamave të makinës ishte i hapur dhe ai ka komunikuar me ata. Pas një debati që mund të ketë pasur mes tyre, ai ka tentuar të largohet me makinë, por ai është qëlluar me armë duke bërë që makina të ecte për rreth 500 m pa kontroll dhe më pas përfundoi në një kanal në anë të rrugës/ Opinion.al
