Ekzekutimi i Devi Kasmit, mbrëmjen e së hënës pati të arrestuarin e parë. Mario Meshini është personi të cilin policia e ka arrestuar duke e akuzuar si “bashkëpunëtor në krim”. Nga ana tjetër avokati i meshinit në një deklaratë për mediat është shprehur se viktima dhe klienti i tij ishin miq të ngushtë, dhe se fakti që ky i fundit i kishte dërguar mesazh për tu takuar gjatë momentit që ndodhi ngjarja nuk e bën të implikuar në krim. Avokati gjithashtu është shprehur se në kamerat e sigurisë është filmuar edhe atentatori, duke e theksuar edhe njëherë faktin që Meshini nuk ka lidhje me vrasjen.
Sipas avokatit të tij, Mario e Devi ishin miq dhe ka rrezikuar jetën në ato momente, pasi autori i ka drejtuar armën.
“Klienti im i tronditur u largua për në shtëpi, nuk ishte dëshmitari i vetëm që pa skenën e tmerrshme. Aty kanë qënë edhe dy infermiere”,- thotë avokati.
Mario Meshini dhe Devi Kasmi ishin shokë, ndërsa mbrëmjen e së hënës Meshini i ka dërguar një mesazh viktimës për tu takuar. Në momentin që Kasmi ka dalë jashtë ambjenteve të banesës, një motorr është afruar dhe ka qëlluar 4 herë mbi të duke e lënë të vdekur. Domart Konjari është personi që akuzohet si vrasësi i Devi Kasmit, por që ka arritur të arratiset. Në njoftimin e policisë për mediat, i arrestuari Mario Meshini akuzohet si bashkëpunëtor në krim. Mbi të rëndojnë akuzat “Vrasja me paramendim”, ”Prodhimi dhe mbajtja pa leje e armëve luftarake dhe e municionit” e kryer në bashkëpunim.
