Eurodeputeti Knut Fleckenstein ka marrë pjesë në mbledhjen e Këshillit Kombëtar të Integrimit. Në fjalën e tij, Fleckenstein u shpreh i lumtur që edhe qëndrimi i Zëvendës Ndihmës Sekretarit të Shtetit Matthiew Palmer ishte i njëjtë me atë të Bashkimit Europian. Fleckenstein foli për sinjale negative që po përhapen në Europë për Shqipërinë pas krizës politike që ka përfshirë vendin.
“SPAK shumë shpejt do të formohet dhe Ministrja e Drejtësisë më ka thënë se do të jetë kuorumi për ngritjen e Gjykatës Kushtetuese. Këto janë lajme shumë të mira që do të ndikojnë në vendimin e qershorit. Unë e kam shprehur opinionin tim se çfarë po ndodh aktualisht në Parlament dhe nuk dua ta përsëris. Jam i lumtur që edhe zv.Ndihmës Sekretari i SHBA, Palmer, ka të njëjtin mendim si neve në Bashkimin Europian. Jam i lumtur që ky Këshill po vazhdon punën, ne na duhen sinjale pozitive, pasi në Europë tani po dëgjojmë disa sinjale negative dhe është e rëndësishme t’i shohim gjërat nga një këndvështrim tjetër. Ajo çfarë jemi dakord si Parlament Europian dyert tona janë të hapura si për parlamentin si për PD. Unë jam optimist, një optimist i kujdesshëm, për sa i përket ecurisë”, ka thënë Fleckenstein.
Eurodeputeti shtoi se reforma zgjedhore mund të bëhet edhe në këtë gjendje nga Parlamenti aktual, pra duke nënkuptuar edhe pa konsensusin e opozitës.
Knut Fleckenstein ishte pjesë e delegacionit të eurodeputetëve që erdhën në Shqipëri pas djegies së mandateve të opozitës. Ai u shpreh kundër këtij vendimi, ndërsa në atë kohë tha se Bashkimi Europian nuk do të bëjë negociatorin, pasi krizën duhet ta zgjidhte vetë klasa politike shqiptare. Të njëjtën gjë, Fleckenstein e tha edhe sot./Opinion.al
