Mohamed Lahouaiej Bouhlel, personi i cili mbrëmjen e së enjtes u fut me kamion në mes të turmës së njerëzve, në Nice të Francës, nuk ka lidhje me Islamin. Kështu u shpreh për “MailOnline” një i afërm i tij. 31 – vjeçari, i cili i shndërroi festimet e Ditës së Bastille në mort, duke i marrë jetën 84 personave të pafajshëm, pinte alkool, hante mish derri dhe bënte drogë.
Ai nuk falej dhe nuk shkonte kurrë në xhami dhe dhunonte bashkëshorten, me të cilën kishte 3 fëmijë dhe që ishte në proces divorci. Bouhlel, i cili ishte i njohur për autoritetet policore franceze që prej Janarit, ishte nën radar prej 6 muajsh për vepra të ndryshme penale.
Siç shkruan “DailyMail”, ai mësohet se kishte humbur vendin e punës si shofer transporti, pasi e kishte zënë gjumi teksa ishte në timon dhe ishte përplasur me 4 makina. Ai ishte përfshirë gjithashtu në një sherr në një lokal. Walid Hamou, një kushëri i gruas së Bouhlel, Hajer Khalfallah për “MailOnline” tha: “Bouhlel nuk ishte besimtar, nuk shkonte në xhami, nuk falej dhe nuk mbante ramazan. Pinte alkool, hante mish derri dhe bënte drogë. Të gjitha këto janë të ndaluara ne fenë islame. Ai nuk ishte mysliman ishte m**. Rrihte bashkëshorten, ishte njeri i keq”.
Ditën e djeshme, 31 – vjeçari ishte ndaluar nga policia vetëm pak orë para se të kryente masakrën. Ai mësohet se i tha policisë se po shpërndante akullore në zonë dhe u lejua të pakontë për disa orë. Bashkëshortja e Bouhlel, ditën e sotme u mor në mbrojtje nga policia.
