Një grua mirditore, Rigerta Loku, ditën e sotme, nga foltorja e Kuvendit ka mbajtur një fjalim emocionues që drithëroi të madh e të vogël, në sesionin përmbyllës të Parlamentit të Parë Rural Shqiptar.
Loku tregoi se pas mbarimit të studimeve në Itali, u kthye në vendlindje dhe hapi një fermë me 300 dhi, ideja ishte të merrej me kafshën politike, provinca e detyroi që të merrej me kafshën zoologjike, pasi ajo dhe bashkëshorti nuk janë penduar për asnjë minutë që janë fshatarë, blegtorë që kanë bërë një gjë të vogël.
“Jam shumë e emocionuar, ndjej që do iki prapë në provincën time dhe pesha dhe përgjegjësia do bjerë mbi këta deputetë. Këta deputetë që rrinë ulur këtu të na nderojnë ne dhe veten e tyre”, tha Loku ndërsa shpërtheu disa herë në lot dhe mori duartrokitjet e deputetëve të Kuvendit.
Sipas saj, ky vend ka nevojë për punëtorë që kanë nevojë për pak llafe e shumë punë.
Vajza nga Rubiku u kthye nga Italia gjashtë vjet më parë, pasi studioi shkenca politike në universitetin prestigjoz të “La Sapienza-s” në Romë dhe u specializua për marrëdhënie ndërkombëtare; dy diploma që i jepnin sigurinë se mund të ndërtonte një karrierë në qytetin e saj të lindjes në Veri të Shqipërisë.
Kush është Rigerta Loku?
Rigerta Loku ka studiuar për shkenca politike në universitetin prestigjoz të “La Sapienza-s” në Romë dhe është specializuar për marrëdhënie ndërkombëtare.
Ajo u rikthye vite më parë në Shqipëri, po pavarësisht shkollimit, bashkitë në Rubik dhe Rrëshen nuk ia pranuan ‘cv’-në, ndërkohë që i kërkuan të rreshtohej politikisht.
Rigerta refuzoi të kapej nga politika, por së bashku me bashkëshortin e saj vendosën të hapin një fermë në fshatin Prosek, në Mirditë.
Por edhe pse është vetëm 6.5 km larg qytetit të Rrëshenit, rruga për në fshatin Prosek kërkon më shumë se 40 minuta me një automjet të lartë, pasi rruga e keqe nuk mundëson kalimin e automjeteve të tjera.
