Shqipëria dhe Italia kanë nënshkruar paraditen e kësaj të marte dokumentin përfundimtar të marrëveshjes për njohjen reciproke të sigurimeve shoqërore.
Marrëveshja në fjalë u firmos nga ministri për Evropën dhe Punët e Jashtme të Shqipërisë, Igli Hasani dhe homologu Italian, Antonio Tajani.
Në një postim në rrjetin social “Facebook”, Hasani shkruan se kjo marrëveshje iu garanton qytetarëve të të dy vendeve të drejtën për të gëzuar të gjitha përfitimet e kontributeve të tyre.
“Premtim i mbajtur! Marrëveshja për Sigurimet Shoqërore ndërmjet Shqipërisë dhe Italisë, e nënshkruar sot, u garanton qytetarëve të të dy vendeve të drejtën për të gëzuar të gjitha përfitimet e kontributeve të tyre, lehtëson aksesin në këto përfitime dhe lejon pagesën e pensioneve jashtë vendit.
Rezultat i një pune të gjatë të palëve, si dhe i angazhimit personal të Kryeministrit Edi Rama dhe Zv. kryeministrit dhe Ministrit te Jashtëm të Italisë Antonio Tajani, kjo marrëveshje e rëndësishme është arritja e rradhës e marrëdhenieve të shkëlqyera ndërmjet dy vendeve”,-shkruan Hasani. /Opinion.al
