Gazetarja Fiori Dardha është shprehur e revoltuar me mënyrën si po menaxhohet Bashkia e Tiranës. Ajo ka marrë shkas nga bllokimi i makinës që i ka bërë Policia Bashkia për parkim të gabuar për të shprehur qendrimin e saj. “Bashkia duhe të sigurojë parkim qoftë edhe me pagesë”, shprehet ajo në Instagram ku ka postuar edhe fletat e gjobave.
“Do të ishte më e ndershme të propozojë një ligj si në komunizëm, për ndalimin e qarkullimit të makinave private, sesa të më gjobisë vjedhurazi”, shkruan Dardha e cila aktualisht moderon emisionin ‘Fiks Fare’ në TCH, bashkë me Genti Pjetrin.
Statusi i plotë i Fiori Dardhës
Kjo nuk është Tirana që dua!
Dje dhe sot kam marrë dy gjoba për parkim të gabuar. Parkimin, njësoj si pardje, e kam bërë ekzakt në të njëjtin vend. Në fakt, ai është i vetmi vend, ku mundësohet parkimi në lagjen time, tek Prokuroria e Përgjithshme. Deri sot, nuk kishte asnjë tabelë që më ndalon parkimin. Praktikisht, kam marrë dy gjoba të paligjshme, sepse Bashkisë, i vrasin sytë makinat dhe preferon biçikletat. (Ky është hamendësimi më dashamirës që mund të bëj.) Por unë nuk mund të bëj sikur jam tip kaq trendy sa të më pëlqejnë biçikletat. Nuk mund të bëj dot as si pariziene e vogël dhe të shkoj në punë, të dal shëtitje apo të bëj pazar duke vënë tek koshi i biçikletës disa lule, një baguette apo pak djathë brie.
Tirana jonë është me ajër kaq të ndotur, me kaq pak gjelbërim, me rrugë kaq të prishura dhe me gropa, sa nuk mund të tallem dot me veten dhe të pranoj se biçikleta është zgjidhja. Preferoj më mirë të paguaj taksat për makinën time.
Nëse Bashkia nuk është në gjendje të më sigurojë parkim, qoftë edhe me pagesë, do të ishte më e ndershme të propozojë një ligj si në komunizëm, për ndalimin e qarkullimit të makinave private, sesa të më gjobisë vjedhurazi apo të më heqë arbitrarisht çdo hapësirë parkimi.
Nëse “Tirana që duam” do të ndërtohet kundër qytetarëve të vet, atëherë preferoj të jetoj në Londër! Dhe nëse kështu u bëkërka shteti, atëherë më duhet të rikonsideroj idenë se Donald Trump është i zgjedhshëm!
