Duhet afro 1 orë që të publikohen formacionet zyrtare të finales së Ligës së Kampionëve, por nga të dhënat e fundit mediat spanjolle kanë zbuluar një surprizë në formacionin e Realit të Madridit.
Uellsiani Garet Bejl me shumë mundësi do të jetë titullar duke lënë në stol mesfushorin Isko, i cili ishte parashikuar deri tani në formacionin bazë. Lajmin e shkruan “Marca”, por ende nuk dihet nëse Bejl e ka fituar zyrtarisht balotazhin me spanjollin.
Nëse Bejl do të jetë titullar, atëherë madrilenët pritet të ndryshojnë edhe skemën sepse nga 4-3-1-2 do të kalojnë në 4-3-3. Lëvizje disi e detyruar nga trajneri Zidan, duke parë skemën dhe lojtarët që do të zbresë në fushë rivali i tij Alegri.
Juventusi ka zgjedhur Alveshin në krahun e djathtë dhe Barzaljin pas tij, në një skemë që mbetet për t’u parë në fillimin e lojës. Me këta lojtarët, Alegri mund të luajë me modulin 3-4-2-1, por edhe me 4-2-3-1.
