Kryeministri Edi Rama ka prezantuar këtë të premte “Kalendari Kombëtar Turistik” për Shqipërinë. Kreu i Qeverisë tha se ky “kalendar” do të aksesoret tashmë përmes një aplikacioni.
Kryeministri është shprehur se ky kalendar është finalizuar pas një pune të gjatë prej vitesh dhe u mundëson turistëve nga e gjithë bota ta njohin vendin tonë në të gjitha drejtimet.
“Kalendari Kulturor dhe Artistik është një punë e filluar prej vitesh bashkë me Mirelën, dhe sot është në një fazë të re, por në zhvillim të vazhdueshëm sepse e besojmë shumë që Shqipëria turistike është përtej ujërave të mrekullueshëm të detit, përtej majave magjike të maleve, përtej luginave e bukurive natyrore në terësi dhe arsyet për ta vizituar janë shumë më tepër se sa kaq.
Bashkimi në ofertën tonë turistike i trashëgimisë kulturore, artit, gatimit, aktiviteteve më bashkohore janë një mundësi e jashtëzakonshme për të rritur kapacitetin që Shqipëria ka në thithjen e turistëve nga e gjithë bota dhe faktikisht ky kalendar me këtë aplikacion bëhet tërësisht i aksesueshëm. Çdokush informohet në kohë reale, sipas vendndodhjes për çdo mundësi që ka në një perimetër të caktuar për të aksesuar teatër, koncerte, festa, muzeume e të tjera me radhë”,-tha Rama.
