“Nuk jam as viktimë dhe as hero”, ka thënë filozofi Alain Finkielkraut i cili u sulmua verbalisht ditën e djeshme nga një grup protestuesish në Paris, të njohur si “jelekverdhët”. Për “Le Journal du Dimanche” ai ka thënë se protestuesit ishin gati ta rrihnin, por për fat aty pranë ishte policia. “Ndjeva urrejtjen absolute dhe për fat të keq nuk është hera e parë. Kisha frikë se mos nuk do të vinte policia, por për fat ata ishin aty”, është shprehur akademiku. Gjithsesi, ai shtoi se jo të gjithë personat që e rrethonin ishin agresivë dhe se njëri prej tyre kishte tentuar ta ndihmonte duke e larguar prej aty.
Protestuesit e sulmuan dje në një prej rrugëve të Parisit duke e quajtur “hebre i ndyrë”, “sionist i qelbur”, “Franca është e francezëve”, “Palestina”, “populli do të të ndëshkojë”. Një prej agresorëve është identifikuar dhe ka qenë vetë Ministri i Brendshëm francez që e ka dhënë lajmin nëpërmjet një statusi në Twitter. “Një i dyshuar, që mendohet të jetë organizatori i fyerje, është identifikuar nga shërbimet tona”, ka shkruar Christophe Castaner.
Sulmet ndaj filozofit dhe akademikut Alain Finkielkraut erdhën pasi disa ditë më parë ai kishte kritikuar lëvizjen e jelekverdhëve në një intervistë për “Le Figaro”.
