Policia ka ndaluar shoferin e ambulancës së morgut të Vlorës, pasi teksa po transportonte trupin e pajetë të Erald Novruzit, e ka filmuar dhe dërguar pamjet gazetarëve.
Trupi i pajetë i të riut u gjet rreth 700 metër nga rruga kryesore në zonën e “Prroit të Gjipesë”.
31-vjeçari u vra me armë zjarri nga Gerlado Shehu. I riu u vra me dy plumba në shkallët e hotelit ku ai punonte si recepsionist nga bashkëpronari i biznesit, i cili i kërkoi ndihmë dy punëtorëve Daniel Qose dhe David Larti, për t’i sjellë qese dhe për ta futur në bagazh. Pasi hodhi trupin anësh rrugës në Gjipe, Shehu u arratis drejt Greqisë, ku u arrestua të enjten pasdite.
“Në vijim të veprimeve hetimore që po kryhen nga grupi hetimor për dokumentimin e plotë ligjor të vrasjes së shtetasit E. N., grupi hetimor ka marrë informacion se shoferi i autoambulancës që po transportonte për në morgun e Vlorës trupin e shtetasit E. N., i cili u vra me armë zjarri nga shtetasi G. Sh., kishte filmuar me aparat celular trupin e pajetë për t’ua dërguar burimeve mediatike me qëllim publikimin.
Bazuar në këtë informacion, shtetasit A. I., 62 vjeç, me detyrë shofer i ambulancës së morgut, i është bërë këqyrja e aparatit celular nga grupi hetimor, ku i janë gjetur pamjet filmike të trupit të shtetasit E. N., të cilat ua kishte dërguar burimeve mediatike me qëllim publikimin.
Në vijim të veprimeve, u bë ndalimi i shtetasit A. I., 62 vjeç, me detyrë shofer i ambulancës së morgut Vlorë, për veprën penale “Zbulimi i akteve dhe të dhënave sekrete”,”-njofton policia.
