Skenaristi, fitues i çmimit “Oscar”, ka marrë përsipër që të punojë në biografinë e poetit të shekullit XIII Jalaluddin al-Rumi.
David Franzoni – i cili shkroi skenarin e filmit të njohur “2000” – dhe Stephen Joel Brown, producent i filmit për Rumin, kanë thënë se ata mëtojnë të sfidojnë portretizimin stereotipik të personazheve myslimane në kinemanë perëndimore, duke e përshkruar jetën e dijetarit të madh sufi, shkruan “The Guardian”, transmeton “Koha Ditore”.
“Ai është si Shakespeare”, ka thënë Franzoni. “Ai është personazh i cili kishte talent të jashtëzakonshëm dhe i vlefshëm për shoqërinë dhe njerëzit e tij, e kjo është e qartë se reflekton edhe sot. Për këta njerëz ia vlen gjithmonë të eksplorohet”, ka shtuar ai. Producentët shpresojnë që të fillojnë xhirimin e filmit vitin që vjen. Franzoni dhe Brown ishin në Stamboll para disa javësh për tu takuar me ekspertët e Rumit dhe vizituan mauzoleun mistik në Konya.
“Është projekt shumë emocionues dhe natyrisht shumë sfidues”, ka thënë Franzoni. “Janë shumë arsye përse duam të realizojmë një projekt të tillë, pikërisht tani. Mendoj se është një botë për të cilën duhet të flitet; Rumi është shumë i popullarizuar në ShBA. Mendoj se kjo do t’i japë atij një fytyrë dhe një histori”, ka shtuar ai.
Koleksionet poetike spirituale dhe mistike të Rumit, “Masnavi” dhe “Divan” konsiderohen si poezitë më të mira të shkruara ndonjëherë, dhe janë të përkthyera në shumë gjuhë të botës. Mësuesi sufi, i cili në rini u largua nga vendlindja, e cila sot njihet si Afganistan, gjatë invadimit mongol, udhëtoi nëpër Bagdad, Mekë dhe Damask me familjen e tij si refugjat para se të vendosej në Konya, apo në Turqinë e kohëve moderne dhe vdiq në moshë të shtyrë…/Koha.net
