Pas kaq muajsh pritje, më në fund Apple filloi lançimin e iOS 11.3. Sistemi i ri operativ do të jetë i disponueshëm për iPhone, iPad dhe iPod Touch. Në janar Apple zbuloi disa nga tiparet e reja që do të jenë pjesë e përditësimit të fundit.
Një nga opsionet kyçe do të jetë për baterinë – kompania filloi punimet menjëherë pasi u zbulua që Apple po ul përformancën e baterive te telefonat e modeleve më të hershme. Me iOS 11.3 përdoruesit do të kenë mundësi të shohin edhe përqindjen e baterisë, një opsion ky që u hoq me daljen në treg të iPhone X.
Në deklaratën zyrtare u tha: “Përdoruesit mund ta shohin dhe ta menaxhojnë më mirë tani konsumin e baterisë për të shmangur kështu fikjen e papritur të telefonit.”
Animoji – emojit e animuara që imitojnë zërin dhe mimikën e përdoruesit janë përditësuar gjithashtu. Janë shtuar katër karaktere të reja, ndër to edhe kafka dhe dragoi.
Përmirësime ka pasur edhe në ARKit dhe aplikacionin e shëndetit ku përdoruesit tashmë mund të ruajnë të dhënat e tyre mjeksore, por kjo është në bashkëpunim me vetëm disa klinika në Shtetet e Bashkuara.
Përveç këtyre përmirësimeve, Apple po merr në konsideratë edhe shtimin e disa emoji-ve të reja për personat me aftësi të kufizuara./Opinion.al
