Trajneri i Francës, Didier Deschamps, nuk dëshiron të bëj një përgatitje gjigante në prag të ndeshjes së parë të Euro 2016 për të mos i konsumuar menjëherë futbollistët e tij në aspektin psikologjik. Francezët do të luajnë ndeshjen e parë zyrtare në dy vitet e fundit, të premten kundër Rumanisë në “Stade de France”, stadiumi ku “gjelat” mposhtën Brazilin në finalen e Kupës së Botës 1998.
Në Francë, vendasit fituan edhe Euro 1984 dhe skuadra aktuale e Deschamp ka në përbërje cilësinë e duhur për të pretenduar të përsërisë edhe një herë suksesin në tokën amtare. Deschamp ishte kapiteni i Francës që fitoi titullin e fundit kampion europe në Euro 2000.
“Nuk e kthej kokën pas në Kupën e Botës 1998 apo në Euro 2000 kur fitova me Francën, sepse ka kaluar shumë kohë dhe nuk kam të njëjtin rol në skuadër, – tha Deschamp, i cili ka luajtur 103 ndeshje me “gjelat”. – Ne duhet të fillojmë të ngjitemi në këtë mal, por dalë nga dalë.
Ndeshja e së premtes do të jetë e para zyrtare dhe kemi dy vjet që datën 10 qershor e kemi të qartë në mendje për të qenë plotësisht të gatshëm. Patjetër që është ndryshe nga ndeshjet miqësore, por nuk kemi bërë një prag sfidë të jashtëzakonshme për të mos i konsumuar menjëherë të gjitha energjitë dhe përqendrimin psikologjik të lojtarëve tanë.
Nuk e kemi përgatitur ndeshjen ndaj Rumanisë si të ishte ndeshja e jetës, vetëm si një ndeshje shumë e rëndësishme.”
